Мэдээ

2025 оны 12 дугаар сарын 8

Улаанбаатар хот

Өнөөдөр Зүүн хойд Азийн Аюулгүй байдал, стратеги судлалын хүрээлэн (ЗХААБССХ) болон МУИС-ийн Улс төр судлал, олон улсын харилцаа, нийтийн удирдлагын сургууль (УТСОУХНУС) хооронд хамтран ажиллах санамж бичигт гарын үсэг зурлаа. Санамж бичигт ЗХААБССХ-ийн захирал Н.Доржсүрэн, УТСОУХНУС-ийн захирал С.Мөнхбат нар гарын үсэг зурсан юм.

Энэхүү хамтын ажиллагаа нь талуудын судалгаа, эрдэм шинжилгээ, мэдээлэл-туршлага солилцоо, олон улсын хамтын ажиллагааг өргөжүүлэх зорилготой бөгөөд дараах үндсэн чиглэлд хамтран ажиллахаар тохиролцов. Үүнд:

• “Стратеги судлал”, “Политологи”, “Олон улсын харилцаа”, “World Affairs”, “Бодлогын мэдээ” болон олон улсын зэрэглэлтэй сэтгүүлд өгүүлэл харилцан болон хамтран нийтлэх;
• Багш, судлаач, оюутнуудад тодорхой сэдвээр мэдээлэл, лекц хийх;
• Гадаадын сургалт, судалгааны байгууллагуудтай хамтын ажиллагаанд дэмжлэг үзүүлэх, холбон зуучлах;
• УТСОУХНУС-ийн суралцагсдыг ЗХААБССХ-д үйлдвэрлэлийн болон танилцах дадлагад хамруулах;
• Үндэсний болон олон улсын хэмжээний хурал, хэлэлцүүлэг, семинар, сургалтыг хамтран зохион байгуулах, харилцан оролцох;
• Мэргэжлийн чиглэлийн мэдээлэл, туршлага солилцох, хамтарсан судалгааны төсөл хэрэгжүүлэх зэрэг хамтын ажиллагааг өрнүүлэхээр тохирлоо.

Хамтын ажиллагааны хүрээнд зохион байгуулагдах арга хэмжээ, үр дүнг олон нийтэд сурталчлах, хамтран ажиллаж буй талаар дурьдсан мэдээлэл түгээх боломжтой гэж талууд зөвшилцөв.

Санамж бичиг нь 2025–2028 он хүртэл хүчинтэй байх бөгөөд хэрэгжилтийг хугацааны эцэст талууд хамтран дүгнэхээр болов.